Áslaug Arna Sigurbjörnsdóttir, ritari Sjálfstæðisflokksins, mun taka við embætti varaformanns flokksins. Bjarni Benediktsson formaður flokksins greindi frá þessu í hádegisfréttum Bylgjunnar í dag.
Áslaug verður áfram ritari flokksins samhliða varaformannsembættinu þar til kosið verður í embætti varaformanns á ný á landsfundi flokksins. Landsfundur flokksins átti að fara fram dagana 3.-5. nóvember en honum hefur verið frestað vegna komandi þingkosninga.
Frá því að Ólöf Nordal féll frá hefur flokkurinn verið án kjörins varaformanns. Bæði Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra og Guðlaugur Þór Þórðarson utanríkisráðherra höfðu verið orðuð við stöðu varaformanns.