David Beckham hefur eytt síðustu dögum á ferðalagi um Ísland. Hann lenti hér á landi síðastliðinn miðvikudag og skellti sér í laxveiði í gær. Nú virðist sem Beckham sé farinn af landinu en hann þakkaði fyrir sig með kveðju á Instagram í morgun.
Sjá einnig: Beckham skellti sér í laxveiði: „Þeir duttu kannski úr leik á HM en ég elska Ísland”
Beckham kom til landsins með fjárfestinum Björgólfi Thor og kvikmyndaleikstjóranum Guy Ritchie. Hann virðist hafa verið sáttur við dvölina og segir að ferðin hafi verið fullkomin í nýrri færslu á Instagram.
„Fallegt land, fallegt fólk, gestrisnin var sennilega sú besta sem við höfum fengið,“ segir Beckham.
Þeir félagar ferðuðust um landið með þyrlu sem má sjá á myndunum sem Beckham deildi á Instagram. Það virðist hafa gengið vel hjá honum að veiða en hann birti nokkrar myndir af sér með fisk en myndirnar má sjá hér að neðan.