Vinnustaður Birnu Brjánsdóttur, verslunin Hagkaup á annarri hæð í Kringlunni, verður lokuð eftir kl. 13 í dag vegna jarðarfarar hennar. Útförin verður gerð frá Hallgrímskirkju og hefst afhöfnin kl. 15. Bestu vinir Birnu munu bera kistuna út úr kirkjunni.
Birna fæddist 28. nóvember í Reykjavík. Hún bjó fyrstu þrjú árin í Breiðholtinu en ólst upp í Safamýrinni upp frá því og bjó þar til átján ára aldurs þegar hún flutti til föður síns í Breiðholti. Hún gekk í Álftamýraskóla og tók nokkrar annir í framhaldsskóla auk þess sem hún vann sem sölumaður í Hagkaup í Kringlunni síðustu ár.
Birnu var ráðinn bani 14. janúar. Hún fannst látin í fjörunni við Selvogsvita á Reykjanesi 22. janúar, rúmri viku síðar eftir umfangsmikla leit. Rannsókn á morði hennar stendur enn yfir og var gæsluvarðhald framlengt um hálfan mánuð í gær yfir grænlenskum manni sem er grunaður um að hafa orðið henni að bana.