Dagbjört Guðrún Rúnarsdóttir var dæmd í tíu ára fangelsi fyrir líkamsárás í Héraðsdómi Reykjavíkur í gær. Þetta staðfestir verjandi Dagbjartar – Arnar Kormákur Friðriksson við mbl.is sem greinir fyrst frá.
Líkt og kemur fram hér að ofan var dómur kveðinn upp í gær en vegna sumarlokunar héraðsdóms var hann ekki kveðinn upp í dómssal heldur sendur rafrænt á þá sem að málinu komu. Dagbjört var dæmt fyrir brot á 218. grein almennra hegningarlaga en þar segir orðrétt:
„Hafi maður með vísvitandi líkamsárás valdið öðrum manni tjóni á líkama eða heilbrigði, og þessar afleiðingar árásarinnar verða taldar honum til sakar vegna ásetnings eða gáleysis, þá varðar það … 1) fangelsi allt að 3 árum, eða sektum, ef sérstakar málsbætur eru.
– Nú hlýst stórfellt líkams- eða heilsutjón af árás eða brot er sérstaklega hættulegt vegna þeirrar aðferðar, þ. á m. tækja, sem notuð eru, svo og þegar sá, er sætir líkamsárás, hlýtur bana af atlögu, og varðar brot þá fangelsi allt að 16 árum.“
Dómurinn komst að þeirri niðurstöðu að Dagbjört væri ekki sek um manndráp líkt og kveðið er á um í 211. grein almennra hegningarlaga en var hinsvegar dæmd fyrir 2. málsgrein 218. greinar almennra hegningarlaga líkt og hægt er að sjá hér að ofan.