Dularfullir og yfirgefnir staðir eru eitt helsta áhugamál Ben Stevens en hann er þekktur fyrir að ljósmynda slíka staði úti um allan heim. Nýjasti „staðurinn“ sem hann heimsótti var risastór ferjubátur sem liggur nú við bryggju í Flórída-fylki í Bandaríkjunum.
Um er að ræða ferjubát sem var gerður út til þess að stunda fjárhættuspil en á tímabili var slíkt bannað í Flórída og því brugðu menn á það ráð að sigla út fyrir „landhelgina“ þar sem engin lög náðu yfir slíka starfsemi. Báturinn heitir Blue Horizon og sigldi út frá höfninni í Palm Beach í fyrsta sinn árið 2015 en um það bil ári síðar hafði hann hætt starfsemi.
Allt í myglu, alvöru seðlum og spilapeningum
Þegar hinn þrítugi Ben gekk um borð Blue Horizon þá var eins og ferjubáturinn hefði frosið í tíma og rúmi en um borð voru til að mynda spilakassar í fullkomnu ástandi. Eins og sést á meðfylgjandi myndum er eins og fólkið hafi lagt frá sér spilin, gengið frá borði og aldrei komið aftur.
„Það var bæði óhugnanlegt og áhugavert að sjá allt sem var skilið eftir. Allt frá alvöru seðlum og pókerpeningum yfir í heilu húsgögnin. Það var eitt herbergi þarna með öryggisskáp og þar inni voru allir þeir spilapeningar sem fólk hafði skipt út fyrir seðla á sínum tíma,“ sagði Ben í samtali við What‘s The Jam. DailyMail greinir frá.
„Ég var þarna í nokkrar klukkustundir en það var hrikalega heitt þarna um borð og lyktin af myglu var rosaleg.“
Nýju lögin voru banabiti ferjunnar
Blue Horizon sigldi aðeins í fimm mánuði og neyddist til að leggjast að bryggju eftir að spilavítum á landi í Flórída var löglega heimilt að bjóða upp á leiki eins og rúllettu og önnur fjárhættuspil. Robert Weisberg, framkvæmdastjóri PB Gaming sem gerði út ferjuna, sagði að með tilkomu hinna nýju laga hafi skipið misst sérstöðu sína og því ekki lengur haft það aðdráttarafl sem það hafði í byrjun.
Skipstjóri ferjunnar, Mark Wilkerson, lét hafa það eftir sér að það væri erfitt að keppa við spilavíti á landi: „Þú ert fastur um borð í ferju í fjórar klukkustundir og þá er erfitt að gera nokkuð annað en að sitja um borð og bíða eftir því að komast aftur í höfn ef þú tapar öllu snemma.“
En nýju lögin um fjárhættuspil í Flórída-fylki voru þó ekki einu vandræðin sem dundu yfir ferjuna og rekstraraðila hennar, PB Gaming. Fyrstu þrjá mánuðina eftir sjósetningu þurfti fyrirtækið að eyða 9 milljónum dollara, eða tæpum 1,3 milljörðum íslenskra króna, í viðgerð á vél ferjunnar. Slæm fjárfesting? Já. Eins og allt er viðkemur fjárhættuspilum.
