Dreifing á myndbandi sem sýnir fólk stunda kynlíf inni á klósetti á skemmtistaðnum Austur hefur verið kærð til lögreglu. Þetta kemur fram á vef RÚV.
Árni Þór Sigmundsson, yfirmaður kynferðisafbrotadeildar lögreglu, staðfestir í samtali við RÚV að kæran hafi borist í dag en myndbandið var tekið upp um síðustu helgi. Rannsókn á málinu er á frumstigi.
Myndbandið hefur borist borist manna á milli undanfarna daga meðal annars á Facebook. Fleiri en einn tók upp myndband af fólkinu.
Vísir hefur eftir Kolbrúnu Benediktsdóttur varahéraðssaksóknara að um brot gæti verið að ræða samkvæmt persónuverndarlögum og að refsiákvæði hegningarlaga komi einnig til greina, svo sem um ærumeiðingar og/eða blygðunarsemisbrot.