Anna Sigurlaug Pálsdóttir, eiginkona Sigmundar Davíðs, segist standa stolt með sínum eiginmanni í kjölfar Klaustursmálsins sem hefur vakið athygli undanfarna daga. Hún segist ekki skilja hvert íslenskt samfélag sé komið og þakkar fyrir þær fjölmörgu stuðningskveðjur sem hjónunum hefur borist. Þetta kemur fram í frétt Stundarinnar.
Þetta skrifar hún í svari við færslu frá vinkonu sinnar á Facebook. Vinkona hennar fer fögrum orðum um þau hjón í stuðningsyfirlýsingu sem birtist á vegg Önnu Sigurlaugar.
Vinkonan segir að Sigmundur sé besti stjórnmálamaður sem Íslendingar hafa átt í seinni tíð og viðbrögðin við Klaustursmálinu séu ekkert annað en öfund. Þá gefur hún í skyn að einhver hafi sent manninn sem tók samtalið upp á Klaustur til þess að eyðileggja fyrir Miðflokknum.
Anna Sigurlaug þakkar vinkonu sinni og öðrum sem sendu stuðningskveðjur í athugasemd við færsluna. Hún segist ekki skilja hvert íslenskt samfélag sé komið. „Hatrið og þörfin fyrir að smána aðra til að upphefja sjálfan sig,“ skrifar hún meðal annars og er þá að tala um viðbrögð við fréttunum en ekki orðræðu Sigmundar og félaga.
„Ég ætla ekki að segja ykkur hvað hefur gengið á í partýum meðal stjórnmálamanna síðustu árin en það kannski segir allt að við SDG höfum gengið út. Þakka ykkur enn og aftur. Ég stend stolt með Sigmundi mínum enda veit ég hvaða mann hefur að geyma og veit hver líðan hans er núna,“ skrifar hún og bætir við að þó svo að þau hjón séu búin að taka nokkra slagina í gegnum árin þá sé hún nú kjaftstopp.