Enn fleiri einkamyndum af frægum leikkonum og fyrirsætum hefur verið lekið á netið.
Myndunum var lekið á föstudagskvöld og skutu þær fyrst upp kollinum á samskiptasíðunum Reddit og 4chan. Á meðal brotaþola tölvuþrjótanna í þetta skipti eru ofurfyrirsætan Cara Delevingne, leikkonan Anna Kendrick og fyrirsætan Jenny McCarthy. Þá var lekið enn fleiri myndum af Óskarsverðlaunaleikkonunni Jennifer Lawrence.
Bandaríska alríkislögreglan FBI rannsakar lekann.
Fáar stjörnur hafa tjáð sig um lekann en bandaríska leikkonan Gabrielle Union sendi í síðustu viku frá sér yfirlýsingu ásamt eiginmanni sínum, körfuboltamanninum Dwayne Wayde, leikmanni Miami Heat:
Myndum sem aðeins ég og eiginmaður minn deildum og síðar eyddum, hefur verið lekið af hrægömmum. Við erum stöðugt minnt á að alla tíð hafa konur og börn verið þolendur ofbeldis og vald yfir þeirra eigin líkömum verið tekið af þeim. Þessi grimmdarverk gegn konum og börnum halda áfram um allan heim. Öllum þeim sem eru í okkar sporum, ásamt öðrum sem upplifa slíka hatursglæpi, viljum við senda ást og stuðning. Við gerðum ekkert rangt.
Upphaf málsins: Tölvuþrjótar leka myndum af stjörnunum
Í síðustu viku héldu tölvuþrjótarnir uppteknum hætti og láku myndum af Kim Kardashian, Emily Ratajowski, Avril Lavigne, Kate Bosworth, Kaley Cuoco, Vanessa Hudgens, Lake Bell, Gabrielle Union og Hayden Panettiere ásamt fleiri myndum af Jennifer Lawrence.