Færsla Einars Bárðar fjallaði um forstjóra Orkuveitunnar og framkvæmdastjóra Orku náttúrunnar

Forstjórinn sem Einar Bárðarson talaði um í færslu sem vakti mikla athygli á Facebook í gær er Bjarni Bjarnason, forstjóri Orkuveitunnar. Framkvæmdastjórinn sem Einar talaði um í sömu færslu er Bjarni Már Júlíusson, sem var sagt upp störfum hjá Orku náttúrunnar í dag vegna óviðeigandi hegðunar í garð starfsfólks.

Einar hóf færslu sína í gær á því að spyrja hvort Metoo-byltingin hafi ekki örugglega átt sér stað á Íslandi í vetur. „Hitti merkilegan mann í dag, eða öllu heldur ómerkilegan mann,“ sagði hann.

„Hann er forstjóri í stórfyrirtæki með framkvæmdastjóra sem stýrir fjölda eininga fyrir hann. Hann sýndi mér fram á að honum fyndist í lagi að framkvæmdastjóri á hans vakt sendi klámfengna tölvupósta á kven-undirmenn sína á laugardagskvöldum, kalli þær járnfrúr, frekjur, pempíur, grýlur, segi að konur geti blikkað sig upp í launum og í opnu starfsrými fyrir framan samstarfsfólk að ein þeirra gangi ekki út vegna þess að hún sú bara alls ekki nógu gröð.“

Einar segir að forstjóranum hafi fundist í lagi að reka eina þessara kvenna, sem hefur ítrekað gert athugasemdir við þessa framkomu hans við starfsmannastjóra Orkuveitunnar.

Færsluna má sjá hér fyrir neðan

Forstjórinn Bjarni Bjarnason segist í samtali við Vísi hafa átt fund með Einari í kjölfar starfsloka eiginkonu Einars hjá Orku náttúrunnar.

Hann segir á Vísi upplifun sína af fundinum ekki þá sömu og Einars. Hann segist hafa tekið það skýrt fram að lýsingar Einars á hegðun Bjarna Más sé í bága við stefnu Orkuveitunnar og segist hafa sagt Einari að hann líti málið alvarlegum augum.

Á Vísi kemur fram að Bjarni Bjarnason, sem er stjórnarformaður Orku náttúrunnar, hafi átt fund með stjórninni síðdegis í gær og að ákvörðunin um að segja framkvæmdastjóra Orku náttúrunnar upp hafi verið tekin áður en Einar birti færslu sína á Facebook.

Loks segist Bjarni á Vísi fyrst hafa frétt af óviðeigandi hegðun framkvæmdastjórans á þriðjudag.