Lögreglan á höfuðborgarsvæðinu rannsakar þjófnað sem átti sér stað í dag í Hlíðunum en þar var brotist inn í vinnuskúr. Svo virðist sem að þjófurinn eigi lítið af fötum því tilkynnt var um þjófnað á fatnaði úr umræddum skúr. Samkvæmt upplýsingum úr dagbók lögreglunnar er gerandinn ókunnur.
Þá var tilkynnt um innbrot og þjófnað í miðborginni en brotist var inn húsnæði sem verið er að gera upp. Þar var stolið verkfærum og er sá gerandi einnig ókunnur en lögreglan rannsakar málið.
Þrír ökumenn voru stöðvaðir í hverfi 104 fyrir að tala í farsíma á ferð án þess að nota handfrjálsan búnað, það var afgreitt með sekt á staðnum.
Einn ökumaður var stöðvaður í Hafnarfirði en sá er grunaður um akstur undir áhrifum fíkniefna en samkvæmt dagbókinni var hann laus að lokinni blóðsýnatöku.