Sex manns, fimm karlmenn og ein kona, eru enn í haldi lögreglu eftir manndráp í Mosfellsbæ í gærkvöldi, líkt og kemur fram á mbl.is. Ráðist var á karlmann á fertugsaldri við bæinn Æsustaði um kvöldmatarleytið með þeim afleiðingum að hann lét lífið.
Fólkið sem er í haldi lögreglu var yfirheyrt í nótt og fram undir morgun en nú er unnið að því að fara yfir framburði þess og raða saman atburðarrásinni. Eftir það verður ákveðið hvort farið verði fram á gæsluvarðhald yfir fólkinu.
Sjá einnig: Maður látinn eftir líkamsrásás í Mosfellsdal: Sex manns í haldi lögreglu, málið sagt tengjast handrukkun
RÚV segist hafa heimildir fyrir því að málið tengist handrukkun og að þau sem handtekin voru hafi öll komið áður við sögu hjá lögreglu.
Hald var lagt á tvo bíla í gærkvöldi vegna rannsóknar málsins. Annar þeirra var tekinn af vettvangi glæpsins en hinn á Vesturlandsvegi. Íbúi á Æsustöðum varð vitni að árásinni. Lögreglu barst tilkynning um hana kl. 18.24 í gærkvöldi og fór fjölmennt lið lögreglu á vettvang.