Hollensk tæknifrjóvgunarmiðstöð kann að hafa frjóvgað egg 26 kvenna með röngu sæði. Þetta kom í ljós eftir að margar þeirra voru búnar að fæða barnið sem varð til með tæknifrjóvguninni.
BBC greinir frá þvi að læknisdeild háskólans í Utrecht viðurkenndi að mistök hafi orðið á tímabilinu frá apríl 2015 og fram í nóvember 2016. Rannsókn er hafin á málinu.
Talið er hugsanlegt að sæði sem tilheyrði einu pari hafi endað með eggi frá 26 öðrum pörum.
Samkvæmt BBC hefur öllum pörum verið tilkynnt um hugsanleg mistök.
Svipuð mistök hafa áður átt sér stað og má sem dæmi nefna þegar rangt sæði var frjóvgað með eggi konu í Singapore sem fæddi árið 2010. Hún kærði fyritækið þegar hún tók eftir því að húð og hár barnsins var mjög ólíkt henni og eiginmanni hennar sem voru kínversk.