Forsvarsmenn Malaysia Airlines hafa fordæmt grínfréttasíðu sem sagði flugvél frá flugfélaginu hafa nauðlent á Íslandi á mánudag. Fréttin fór eins og eldur í sinu um netheima og forsvarsmönnum Malaysia Airlines er ekki skemmt.
Grínfréttasíðan World News Daily Report birti frétt um að flug MH131 hafi neyðst til að nauðlenda á Íslandi eftir að hiti frá eldgosinu í Holuhrauni skemmdi leiðsögubúnað vélarinnar. Sagt var að vélin hafi verið að fljúga frá París til New York og að hún hafi flogið nánast alveg yfir eldfjallið, þrátt fyrir viðvaranir.
Forsvarsmenn Malaysia Airlines hafa beðið almenning um að láta ekki blekkjast af svo augljósum lygum og fóru fram á að yfirvöld í Malasíu loki fyrir aðgang að grínfréttasíðunni.