Reynir Traustason staðfestir á Facebook-síðu sinni í morgun að félag í eigu Guðmundar Kristjánssonar í Brimi hafi lánað honum peninga. Umfjöllun Nútímans um málið hófst í gær með frétt um bloggfærslu Elliða Vignissonar, bæjarstjóra í Vestmannaeyjum.
Reynir segir:
Óhróður bæjarstjórans í Vestmannaeyjum um mútur Guðmundar Kristjánssonar útgerðarmanns í Brim er með eindæmum. Hann gefur til kynna að blaðamenn DV hafi skrifað í þágu Guðmundar vegna þess að hann hafi veitt lán til mín til hlutafjárkaupa í DV. Síðan er vitnað til nokkurra frétta sem eiga að staðfesta áburðinn. Það er rétt að félag í eigu Guðmundar lánaði mér til kaupa á hlutafé rétt eins og Gísli Guðmundsson, kenndur við B&L, veitti slíkt lán sem síðan fór inn í einkahlutafélagið Ólafstún.
Frétt Nútímans í gær: Segir Guðmund í Brimi hafa lánað Reyni 15 milljónir
Reynir segir lánasamninginn hafa verið gerðan á síðasta ári.
Þessar skuldbindingar mínar eru hluti af neyðaraðgerðum sem gerðar voru til bjargar félaginu. Auk þess er ég persónulega ábyrgðarmaður á 6 milljóna víxli sem DV ehf. gaf út. Þess utan er ég í ábyrgð upp á rúmar tvær milljónir vegna yfirdráttar fyrirtækisins. Af þessu sést að ég hafði mikla persónulega hagsmuni af því að félagið færi ekki illa.