Guðni Th. Jóhannesson, forseti Íslands, minntist leikarans Stefáns Karls Stefánssonar í ræðu sinni við þingsetningu Alþingis í dag. Stefán Karl lést fyrir skömmu eftir baráttu við krabbamein og sagði Guðni að margt væri hægt að læra af æðruleysi hans.
Guðni spurði í ræðu sinni hvað er dýrmætara en heilsa og hamingja. „Til hvers er fullveldi ef fólki líður illa? Hvað skiptir máli þegar allt kemur til alls?“ spurði hann.
Í sumar lést fyrir aldur fram Stefán Karl Stefánsson leikari og baráttumaður fyrir bættum heimi, eftir langt stríð við illvígt mein.
Guðni sagði slíka glímu oft opnar augu fólks, bæði hinna veiku og þeirra sem nærri þeim standa og vitnaði í orð Stefáns Karls: „Við sjáum lífið í öðru ljósi. Maður dustar vitleysuna í burtu og horfir svolítið á kjarna lífsins sem við ættum
öll að gera.“
Guðni sagði að varast skuli að nota stóráföll til að segja öðrum að sætta sig bara við minni vanda. „En margt má samt læra af æðruleysi af þessu tagi, gildismati og lífsviðhorfi,“ sagði hann.
„Og þegar við horfum saman fram á veg berum við vonandi gæfu til að takast á við hin þungvægu verkefni en staldra ekki um of við álitamál sem falla svo með réttu í gleymskunnar dá eins og ríkisráðsákvæðið á sínum tíma – og verja ekki heldur dýrmætri orku í dægurþras, dusta frekar vitleysuna í burtu.“