Hafsteinn Gunnar Sigurðsson kvikmyndaleikstjóri hlaut leikstjóraverðlaunin kvikmyndahátíðinni Skip City International D-Cinema Festival í Japan sem lauk um síðustu helgi fyrir kvikmynd sína „Undir trénu“ að því er kemur fram á vefsíðunni Klapptré.
Myndin fjallar á gráglettinn hátt um nágrannaerjur tveggja fjölskyldna en þau Steinþór Hróar Steinþórsson, Edda Björgvinsdóttir, Sigurður Sigurjónsson, Selma Björnsdóttir, Þorsteinn Bachmann og Lára Jóhanna Jónsdóttir fara með aðalhlutverkin. Þetta eru fimmtu alþjóðlegu verðlaun myndarinnar.
Sjá einnig: 134 milljónum varið í að kynna Undir trénu í Evrópu
Myndin var nýlega tekin til sýninga í Bandaríkjunum og hefur fengið góða dóma gagnrýnenda en The New York Times setti myndina meðal annars á Critic’s Pick-listann.
Á vef Rotten Tomatoes fær myndin 79% skor hjá gagnrýnendum og 66% áhorfenda líkaði vel við myndina.