Kona hefur búið á McDonald’s veitingastað í bænum Vetlanda í Smálöndunum í Svíþjóð síðastliðnar þrjár vikur. Staðurinn er opinn allan sólarhringinn og neitar hún að yfirgefa staðinn.
Konan ferðaðist með lest til bæjarins frá heimabæ sínum og ákvað að búa á veitingastaðnum þangað til að hún finnur stað til að búa á í bænum.
Lögregla hefur boðist til að borga lestarmiða fyrir konuna þannig að hún komist aftur til heimabæjarins en hún afþakkaði það.
Starfsmaður veitingastaðarins segir starfsfólkið hafa reynt allt til að koma konunni í burtu. Þau hafa haft samband við lögregluna, félagsþjónustuna og kirkjuna en án árangurs.
Konan er sögð vilja búa í bænum þar sem hún þekki svæðið vel. Hún á hvorki vini né fjölskyldu í Vetlanda.