Sprengja sprakk á Keflavíkurflugvelli á fjórða tímanum í dag en það mátti teljast kraftaverk að engan hafi sakað. Samkvæmt heimildum Nútímans sprakk sprengja sem var falin í klósettkassa í brottfararsal flugstöðvarinnar. Pípulagningarmaður frá fyrirtæki í Reykjanesbæ var við reglubundið viðhald í flugstöðinni þegar sprengjan sprakk en samkvæmt heimildum Nútímans var hann að gera við sírennsli inni á salerni þegar hann kom auga á aðskotahlut í klósettkassanum.
„Þeir pípulagningarmenn sem Nútíminn ræddi við voru sammála um það að það sé ekkert undir sólinni sem gæti orsakað svona sprengingu undir eðlilegum kringumstæðum. Þetta hlyti að vera heimatilbúin sprengja“
Þegar píparinn hreyfði aðskotahlutinn þá varð mikil sprenging en gríðarlegur viðbúnaður var í Flugstöð Leifs Eiríkssonar í kjölfarið. Samkvæmt fyrstu fréttum íslenskra fjölmiðla var talið að um „víti“ væri að ræða en það eru öflugir flugeldar sem hafa verið teknir í sundur, þeir „teipaðir“ og svo sprengdir. Slíkar sprengjur valda reglulega ónæði á Íslandi, þá sérstaklega í kring um áramót en áhættusæknir unglingar hafa í áraraðir „teipað“ slíka flugelda og sprengt allt frá ruslatunnum yfir í póstkassa.
Fara yfir hverja einustu sekúndu af upptökum
Staðreyndin er hins vegar sú að hin meinta sprengja var inni í klósettkassa og hafði píparinn verið við vinnu á salerninu í dágóða stund þegar hann opnar kassann og reynir að færa aðskotahlutinn. Víti virka hins vegar þannig að þau eru með kveikiþráð og sá kveikiþráður er undir öllum venjulegum kringumstæðum mjög stuttur – að minnsta kosti hefur blaðamaður Nútímans ekki heyrt um slíka sprengju með kveikiþræði á borð við þann sem sést í Hollywood-kvikmyndum.
Samkvæmt heimildum Nútímans slapp píparinn með skrekkinn, var mikið brugðið, eins og gefur að skilja, en eftir sprenginguna fylltist allt af reyk. Sprengjudeild Ríkislögreglustjóra, slökkvilið og lögreglumenn hafa lokað svæðinu af og er mikill viðbúnaður í Leifsstöð.
Fara yfir hverja einustu sekúndu af upptökum
Þá herma heimildir Nútímans að nú sé verið að fara yfir hverja einustu sekúndu af upptökum úr öryggismyndavélum á svæðinu en þær eru þó nokkrar – vonast er til þess að það gefi einhverjar vísbendingar um það hver kom þessu fyrir í klósettkassanum.
Þeir pípulagningarmenn sem Nútíminn ræddi við voru sammála um það að það sé ekkert undir sólinni sem gæti orsakað svona sprengingu undir eðlilegum kringumstæðum. Þetta hlyti að vera heimatilbúin sprengja – allt annað kæmi þeim verulega á óvart. Líkt og áður segir þá er nánast ómögulegt að um „víti“ sé að ræða enda er klósettkassi oftar en ekki fullur af vatni og við slíkar aðstæður er erfitt að tendra í kveikiþræði – hvað þá ef hann er á bólakafi.