Hvað myndir þú borga mikið fyrir að fá kaldan bjór sendan heim til þín?
Svona spyr efnafræðingurinn Daníel Frímannsson á Facebook-síðunni Über ölles. Daníel hyggst bjóða upp á heimsendingu á áfengi úr Vínbúðunum en á þó eftir að stofna fyrirtæki um reksturinn. Þetta kemur fram á Mbl.is.
Hugmyndin er búin að vera lengi í vinnslu en svo fékk ég mér rauðvínsglas og ákvað að setja upp heimasíðu þar sem ég vildi kynna þessa hugmynd. Ég hef fengið nokkuð góð viðbrögð við þessu eftir að ég setti upp auglýsingu á Facebook fyrir helgi.
Á heimasíðu Über ölles er hægt að skrá sig ef maður hefur áhuga á því að nýta þjónustuna. Daníel hyggst svo útbúa app sem fólk getur sótt og byrjað að panta búsið heim.
Í samtali við Mbl.is segist Daníel búast við því að það sé markaður fyrir þjónustuna. „Þetta er önnur lausn en að fara með áfengi í verslanir. Þetta eykur aðgengi með því að búa til annan markað sem snýr að flutningum á vörunni,“ segir hann. „Opnunartíminn í ríkinu hentar þér kannski ekki af einhverjum ástæðum og þú getur fengið þetta sent heim ef þú ert t.a.m. ekki á bíl eða ert fastur í vinnu.“