Grínistinn Steindi Jr. stýrir spurningaþættinum Ghetto betur sem hefst á Stöð 2 í maí. Hlín Einarsdóttir verður dómari í þættinum, Kalli Bjarni stigavörður og María Guðmundsdóttir, sem hefur slegið í gegn í sketsum Steinda, verður plötusnúður.
Samkvæmt frétt Vísis verður fyrirkomulag þáttarins á þá leið að tveir fulltrúar frá hverju bæjarfélagi mæta og spreyta sig á vel völdum spurningum. Liðin þurfa einnig að leysa þrautir og fá einnig fjölbreytt verkefni, eins og til dæmis að stela úr matvörubúðum.
Steindi hyggst einnig skoða bæjarfélögin sem eiga fulltrúa í þættinum og kynna sér aðrar hliðar á þeim.
„Ég get lofað því að MR er ekki að fara að vinna þessa keppni,“ segir Steindi í samtali við Nútímann. Hann fór ekki í Gettu betur sjálfur á sínum tíma en kláraði þó MK — ekki Menntaskólann í Kópavogi heldur tölvuleikinn Mortal Kombat.