Kári Stefánsson, forstjóri Íslenskrar erfðagreiningar, segir líklegra að menn kjósi Sjálfstæðisflokkinn undir áhrifum áfengis. Hann gagnrýnir hugmyndir um að sala áfengis verði gefin frjáls í grein í Morgunblaðinu í dag.
Sjá einnig: Áfengisfrumvarpið lagt fram á ný, hér eru fjórir hlutir sem verða enn þá bannaðir
Kári segir að áfengisneysla aukist þegar það verði byrjað að selja það í matvöruverslunum.
Alkóhólismi er einn af alvarlegustu og algengustu sjúkdómum í okkar samfélagi og ekki á það bætandi. Það er því lítill krókur að rölta í sérverslun til þess að forðast þá keldu sem aukin áfengisneysla landsmanna væri.
Kári bendir á að afstaða Alþingis til fólks og áfengisneyslu hafi aldrei markast af trausti. „Og það hefur til dæmis með lögum skert til muna frelsi þeirra sem eru búnir að neyta þess í einhverju magni og eru undir þeim áhrifum sem eftir er sóst með neyslunni,“ segir hann.
„Þeim er bannað að aka bifreið, fljúga flugvél, stjórna bátum og vera á almannafæri. Það er engin önnur vara sem er löglega seld í landinu sem er með þeim ósköpum gerð að löggjafinn hafi séð ástæðu til þess að skipta sér sérstaklega af gjörðum þeirra sem hafa neytt hennar.“
Kári telur að vonir Bjarna standi til þess að fleiri kjósi Sjálfstæðisflokkinn ef frumvarpið nær fram að ganga.
„Hann veit líka að áfengisdrykkja getur svipt menn ráði, rænu og annarri eðlilegri starfsemi heilans og því sé líklegra að menn kjósi Sjálfstæðisflokkinn þegar þeir eru drukknir en allsgáðir,“ segir Kári.
„Eftir að hlusta á málflutning hans í þessari ræðu er auðvelt að vera honum sammála. Eina vandamálið sem ég sé við þessa atkvæðasmölun formannsins er að kjörstaðir eru almannafæri.“