Frumkvöðull sem kallar sig Zack Danger Brown hefur safnað meira en 70 þúsund dölum, um átta milljónum íslenskra króna, á hópsöfnunarsíðunni Kickstarter. Og fyrir hverju er hann að safna? Skjál af kartöflusalati.
Meira en fimmþúsund manns hafa lagt söfnuninni lið sem hefur þann eina tilgang að fjármagna kaup á kartöflum, majónesi og öðru sem þarf til að hræra í kartöflusalat. „Ég ætla bara að búa til kartöflusalat — ég veit ekki hvernig,“ segir Brown á Kickstarter-síðu sinni og biður fólk um tíu dala framlög.
Fréttasíður um allan heim hafa sagt frá ævintýralegum árangri Brown. Miðað við Twitter-síðu hans leiðist honum ekki frægðin og biður þekkta Hollywood-leikara um hjálp við að gera salatið.
Hey Denison Alums @theJennGarner and @SteveCarell, want to help me make potato salad?
— Zack Danger Brown (@ztbrown) July 9, 2014
23 dagar eru eftir af söfnun Brown og ómögulegt er að segja hversu miklu hann safnar og hvað hann gerir við peningana (eða hversu mikið kartöflusalat).