Kona í borginni Tempe í Arizona í Bandaríkjunum lést eftir að hafa orðið fyrir sjálfkeyrandi bíl á vegum leigubílafyrirtækisins Uber. Þetta kemur fram á vef New York Times. Þar kemur fram að um fyrsta slíka banaslysið sé að ræða.
Bíllinn var á sjálfstýringu en með manneskju undir stýri af öryggisástæðum. Konan var á leiðinni yfir götu þegar bíllinn ók á hana en í yfirlýsingu frá lögreglunni í Tempe kemur fram að hún hafi ekki verið að ganga yfir gangbraut.
Atvikið átti sér stað seint um kvöld eða um nótt en yfirvöld hafa ekki staðfest hvort það var seint á sunnudag eða snemma á mánudegi. Haft er eftir talsmanni Uber að fyrirtækið sýni yfirvöldum fullan samstarfsvilja. Þá hefur fyrirtækið frestað prófun á sjálfkeyrandi bílum sína í Tempe, Pittsburgh, San Francisco og Toronto.