Konur í fjölmiðlum mótmæla því að í stéttinni starfi maður sem hefur ítrekað áreitt og beitt samstarfsfólk sitt ofbeldi

Konur í fjölmiðlum sendu í dag frá sér yfirlýsingu vegna hegðunar Hjartar Hjartarsonar á HM í Rússlandi. Þær krefjast þess að yfirmenn fjölmiðla í landinu tryggi öryggi þeirra og annarra starfsmanna sinna á vinnustað.

74 konur skrifuðu undir yfirlýsinguna og krefjast þess að fastar sé tekið á ofbeldi og áreitni á vinnustöðum þeirra. Þær skora einnig á starfsmenn fjölmiðla að fylgja eftir fögrum fyrirheitum #MeToo byltingarinnar og fjallað sé um ofbeldismál þannig að ofbeldismaðurinn beri ábyrgð á hegðun sinni. Í yfirlýsingunni segir:

„Við skorum einnig á starfsmenn fjölmiðla, stéttarfélög fjölmiðlafólks og sérstaklega yfirmenn Sýnar og annarra fjölmiðla að fylgja eftir fögrum fyrirheitum #MeToo og sýna í verki að þegar ofbeldi og ógnandi hegðun er beitt „kastast ekki í kekki” milli fólks, heldur ber ofbeldismaðurinn einn ábyrgð á sinni hegðun.”

Hjörtur Hjartarson, íþróttafréttamaður hjá Sýn, hefur endurtekið orðið uppvís að því að ógna og veitast að samstarfsfólki sínu. Hirti var sagt upp störfum á RÚV árið 2012, eftir að hann beitti samstarfskonu sína ofbeldi sem varð til þess að hún kærði hann fyrir líkamsárás. Hún dró kæruna til baka eftir að hann axlaði ábyrgð og baðst afsökunar. Hjörtur var einnig sendur í leyfi frá störfum sem íþróttafréttamaður á Stöð 2 eftir að hann réðst á samstarfsmann sinn þar árið 2014. Á dögunum var Hjörtur svo sendur heim eftir að hafa veist á ný að fyrrverandi samstarfskonu sinni á RÚV þar sem hún var við störf á HM í knattspyrnu í Rússlandi.

Sjá einnig: Hjörtur Hjartarson sendur heim frá HM vegna óviðeigandi hegðunar

„Alkóhólismi er alvarlegur sjúkdómur. Hann leiðir þó ekki sjálfkrafa til ofbeldishegðunar. Við, konur í fjölmiðlum, teljum ólíðandi að maður sem ítrekað hefur brotið á samstarfsfólki sínu fái sífellt ný tækifæri í fjölmiðlastétt á þeim forsendum hann sé hættur að drekka. Við höfnum því að vinna við slíkar aðstæður,” segir í yfirlýsingunni.

Samstarfskonur Hjartar á Stöð 2 og Bylgjunni skrifa ekki undir yfirlýsinguna að sinni en eru sagðar fordæma hegðun hans.

Hér að neðan má sjá nöfn þeirra sem skrifa undir yfirlýsinguna: