Margir íbúar á höfuðborgarsvæðinu eru komnir með nóg af verðrinu í sumar. Lítið sem ekkert hefur sést til sólar það sem af er sumri. Meðlimir í Leikhópnum X hafa fengið sig fullsadda af sólarleysinu og hafa sett af stað undirskriftalista þar sem krafist er betra veðurs.
Þar er þrýst á yfirvöld að beita þeim brögðum sem til þarf til þess að auka sólarstundir og velsæld íbúa á suðvesturhorni Íslands.
„Við höfum fengið okkur fullsödd af þessu skítaveðri sem vaðið hefur uppi á suður og vesturlandi! Við krefjumst þess að nú verði tekið á málunum í eitt skipti fyrir öll og yfirvöld beiti þeim brögðum sem til þarf til að auka sólarstundir og velsæld þegnanna á þessum svæðum,“
Guðmundur Ingi Guðbrandsson, umhverfis- og auðlindarráðherra, segir í Facebook færslu í dag að hann hyggist leggja fram drög að aðgerðaráætlun með það fyrir augum að innleiða sólskin á Suður- og Vesturlandi.
„Strax í fyrramálið mun ég setja saman drög að aðgerðaráætlun um nauðsynlega reglugerðarbreytingu svo innleiða megi sólskin á Suður- og Vesturlandi – og hægt verði að tryggja öllum landsmönnum sól í júlí,“ segir Guðmundur á Facebook-síðu sinni.
Leikhópurinn X krefst þess í yfirlýsingu sinni að ef ekki takist að auka sólarstundir á höfuðborgarsvæðinu þá fái íbúar frítt flug til Egilstaða.
„Ef ekki verður látið að kröfum okkar væri ekki nema sanngjarnt að ríkið greiði flug til Egilsstaða þar sem nýr höfuðstaður Íslands rís í sólbjörtu austrinu. Við hvetjum stjórnvöld til aðgerða strax! Spursmálslaust!“
Hér má skrifa undir yfirlýsingu leikhópsins.