Tuttugu og sex ára kanadískur ferðamaður hefur verið dæmdur í þriggja mánaða skilorðsbundið fangelsi fyrir að hafa kýlt Josip Juric-Grgic, handknattleiksmann úr Val, á skemmtistaðnum b5 síðustu helgi.
Árásin var harkaleg og nefbrotnaði Josip við hana. Nefbein hans færðist til, miðnes brotnaði sem og kinnbein. Þá hlaut hann bólgu og mar yfir vinstra auga og sár og bólgu á hnakka.
Ferðamaðurinn þarf einnig að greiða handboltamanninum rúmlega hálfa miljón í skaðabætur en hann játaði brot sitt.
Vísir greindi fyrst frá málinu og ræddi við Óskar Bjarna Óskarsson, þjálfara Vals, sem segir flest benda til þess að Josip verði frá næstu vikurnar. Aðspurður um tilefni árásarinnar segir Óskar eiga erfitt með að svara því. Hins vegar viti hann til þess að mennirnir tveir hafi átt í einhverjum stympingum fyrr um kvöldið.