Nýtt myndband hljómsveitarinnar Maroon 5, við lagið Animals, er harðlega gagnrýnt af samtökunum RAINN, sem styðja brotaþola kynferðisofbeldis.
Myndbandið kom út á mánudag. Í því sést Adam Levine, söngvari Maroon 5, leika blóðugan slátrara og eltihrelli sem brýst inn á heimili konu og leggst upp í rúmið hennar þar sem hún sefur. Konan er leikin af eiginkonu Levine, Behati Prinsloo. Myndbandið breytist svo í einhvers konar kynferðislega blóðbaðsfantasíu.
Katherine Hull, upplýsingafulltrúi RAINN, sagði í yfirlýsingu í gær að myndbandið væri stórhættuleg túlkun á draumórum eltihrellis.
Enginn ætti að rugla glæpsamlegri hegðun eltihrellis saman við rómantík. Gjaldfelling slíkra glæpa ætti ekki að eiga sér stað í skemmtanabransanum.
Myndbandið má sjá hér fyrir neðan: