Leikarinn Bill Paxton er látinn. Þetta kemur fram á vefmiðlinum TMZ. Paxton var 61 árs gamall, var kvæntur Louise Newbury í 30 ár og saman áttu þau tvö börn.
Á vef TMZ kemur fram að leikarinn hafi látist skyndilega eftir að hafa gengist undir aðgerð á laugardag. Paxton lék í kvikmyndum á borð við Titanic, Twister og Aliens og vann Emmy-verðlaun fyrir frammistöðu sína í Hatfields and McCoys.
Í yfirlýsingu frá fjölskyldu Paxton segir að ástríða hans fyrir leiklistinni hafi snert alla sem þekktu hann ásamt hlýju hans og orku.