Aaron Smith leikur fyrir landslið Nýja Sjálands í ruðningi. Hann þarf að sitja hjá í næsta leik, sem fer fram á morgun, þar sem hann stundaði kynlíf með konu á salerni fyrir hreyfihamlaða á flugvelli í Christchurch í síðasta mánuði. Þannig hélt hann einnig fram hjá konu sinni.
Smith, sem er 27 ára, var að bíða eftir flugi ásamt liðsfélögum sínum þegar hann fór inn á salerni á flugvellinum með konu. Um tíu mínútum síðar komu þau út, hvort í sínu lagi. Aðrir gestir flugvallarins urðu varir við þetta og greindu frá atvikinu.
„Ég hef gert stór mistök, sýnt mikið dómgreindarleysi,“ sagði leikmaðurinn, sem er 27 ára, í viðtali við fjölmiðla í gær.
Vildi hann fyrst og fremst biðja konu sína, fjölskyldu hennar og fjölskyldu hans afsökunar. „Hegðun mín var óafsakanleg. Ég er bara að reyna að komast heim og takast á við þetta. Takk fyrir.“
Í tísti landsliðsins á Twitter er staðfest að sést hafi til leikmannsins fara inn á salerni með konu á flugvellinum
Hansen says Smith was seen by entering a toilet cubicle with a female friend at Chch Airport the day after the Chch Test.
— All Blacks (@AllBlacks) October 5, 2016
Liðið, sem nefnist All Blacks, var á leið til Suður Afríku og hefur Smith óskað eftir því að fá að fara aftur heim til Ástralíu.
Ruðningur er þjóðaríþrótt Nýja Sjálands og mikið er litið upp til þeirra sem leika íþróttina. Forsætisráðherra landsins, John Key, blandaði sér í málið og sagði íþróttamanninn hafa orðið sjálfum sér til skammar.