Eurovision verður haldið í Kænugarði, höfuðborg Úkraínu. Aðdáendum keppninnar var farið að lengja eftir upplýsingum um staðsetninguna en tvisvar var búið að fresta blaðamannafundi þar sem tilkynna átti borgina. Frá þessu er greint á Facebook-síðu keppninnar.
Sjá einnig: Eurovision í vandræðum, Úkraína finnur ekki borg fyrir lokakeppnina.
Söngkonan Jamala fór með sigur af hólmi í Stokkhólmi í Svíþjóð í vor með laginu 1944 og því kemur það í hlut úkraínsku þjóðarinnar að vera gestgjafar á næsta ári. 28 lönd hafa tilkynnt að þau ætli að taka þátt í keppinni.
Kænugarður er höfuðborg Úkraínu og einnig stærsta borg landsins. Keppnin hefur einu sinni áður verið haldin í landinu og þá var hún haldin í þessari borg. Lagt hefur verið til að keppnin verði haldið á Palace of Sports-leikvanginum en hún tekur 10 þúsund gesti. Tæplega þrjár milljónir manna búa í borginni. 265 hótel eru í borginni og á svæðinu í kringum hana sem rúma 23 þúsund manns.