Anna Lísa Wíum Douieb, matráðskona á RÚV, er nýjasti liðsmaður Hraðfrétta ásamt Steinunni Skúladóttur, Jóhanni Alfreð og Gunnari Sigurðarsyni. Þá verða þeir Fannar Sveinsson og Benedikt Valsson einnig á sínum stað.
Gunnar Sigurðarson segir að Anna sjái um veðrið og náttúruhamfarir í nýjum og breyttum Hraðfréttum. Þátturinn verður 20 mínútna langur og hefst föstudaginn 26. september.
„Hún er búin að vera að segja okkur hvernig veðrið er,“ segir Gunnar. „Það var því tilvalið að láta hana sjá um það.“
Gunnar segir meiri dýpt verða í Hraðfréttunum í vetur. „Þetta er bara orðið að fréttastofu. Þetta verður skemmtilegt og stressandi. 20 mínútna þættir — þetta er risaverkefni!“