Frumvarp sem heimilar sölu áfengis í verslunum verður lagt fram á haustþingi samkvæmt frétt á Mbl.is. Leyfi til sölu á áfengi verður samkvæmt frumvarpinu ekki einungis bundið við bjór og léttvín heldur verður öll sala leyfð að ýmsum skilyrðum uppfylltum.
Vilhjálmur Árnason, þingmaður Sjálfstæðisflokksins, leggur frumvarpið fram en reiknar með stuðningi úr sínum flokki og öðrum. Karl Garðarsson, þingmaður Framsóknar, hefur þegar stutt frumvarpið.
Frumvarp sem heimilar sölu á áfengi í verslunum var síðast lagt fram árið 2007. Þá voru fjórir núverandi ráðherrar Sjálfstæðisflokkins meðflutningsmenn, þau Bjarni Benediktsson, Illugi Gunnarsson, Kristján Þór Júlíusson og Ragnheiður Elín Árnadóttir. Árni Páll Árnason, formaður Samfylkingarinnar, var líka meðflutningsmaður og Ragnheiður Ríkharðsdóttir, þingflokksformaður Sjálfstæðisflokksins.