Íslenska stefnumótaforritið The One kom út fyrir helgi en stefnumótaforritið sker sig úr vegna þess að konur ráða hvaða karlmenn geta fengið aðgang. Þetta á að vera gert til þess að minnka áreiti.
Sjá einnig: Þakkar Tinder fyrir dóttur sína: „Annar vettvangur en að hittast drukkin á skemmtistað”
Í tilkynningu frá framkvæmdastjóra The One til fjölmiðla í dag segir að þetta hafi þegar valdið því að allt of margar konur eru með aðgang en það vanti karlmenn.
Forritið virkar þannig að á hverjum degi opnast fyrir spjalltengingu við einn notanda sem hverfur svo á miðnætti. Eina leiðin til að halda spjallinu gangandi eftir miðnætti er ef báðir aðilar ákveði að framlengja spjallið.
„Karlmenn þurfa að fá boðslykil frá konu til þess að geta byrjað að nota appið, sem hefur mælst mjög vel meðal kvenna. Karlmenn virðast hinsvegar vera feimnir við að biðja um boðslykil, sem er vel skiljanlegt. Við gerum ráð fyrir að karlmenn muni taka við sér, enda er orðið að mörgu leiti hefðbundnara að fólk kynnist á stefnumóta öppum, frekar en á barnum. Rannsóknir sýna að með hverjum mánuðinum sem líður finnst fólki minna og minna hallærislegt að nota stefnumóta öpp,“ segir Davíð Örn Símonarson framkvæmdastjóri The One.