Eigendur fataverslunarinnar Húrra Reykjavík munu opna nýjan hamborgarastað við Hverfisgötu 44 í september. Á hamborgarastaðnum sem mun heita Yuzu verður lögð áhersla á hamborgara og smárétti undir austurlenskum og japönskum áhrifum. Þetta kemur fram á vef Útvarps 101.
Sindri Snær Jensson, einn af þremur stofnendum staðarins, segir í samtali við Útvarp 101 að staðurinn muni bjóða upp á nýstárlegan og ferskan valmöguleika þegar kemur að hamborgurum á Íslandi.
„Staðurinn mun höfða til þeirra sem vilja fljótan, léttan bita í hádeginu ásamt þeirra sem vilja setjast niður á kvöldin í góðra vina hópi og njóta hágæða hamborgara og drykkja. Yuzu er ávöxtur af sítrus fjölskyldunni Rutaceae og er einstaklega fallega gulur á litinn. Sítrus-ávöxturinn sem er hár í sýru og gerir allt ferskara og bragðið er mjög einkennandi og verður notaður í bæði mat og drykki,“ segir Sindri við Útvarp 101.
Hann bætir því við að væntingastjórnun sé ekki þeirra sterkasta hlið og þeir hafi aldrei sparað stóru orðin. Þeir hafi gríðarlega mikla trú á Yuzu.
„Nútímaneytendur eru kröfuharðir og það réttilega, við ætlum að framreiða besta hamborgarann á Íslandi þótt víðar væri leitað.“