Ákæra gegn pari fyrir gróf kynferðisbrot gegn börnum sínum var þingfest í Héraðsdómi Reykjaness í dag. Parið játaði sök að hluta til við þingfestinguna. Þetta kemur fram í frétt á vef Rúv.
Rannsókn málsins hófst þegar dóttir konunnar lagði fram kæru á hendur parinu fyrr á þessu ári. Þau voru í framhaldinu úrskurðuð í gæsluvarðhald. Konan játaði við yfirheyrslur hjá lögreglu en gerði lítið úr sínum hlut. Henni var sleppt úr gæsluvarðhaldi eftir hálfan mánuð í haldi en var úrskurðuð í gæsluvarðhald á nýjan leik í byrjun mánaðarins eftir að ákæra í málinu var gefin út. Maðurinn hefur verið í gæsluvarðhaldi frá því að málið kom upp.
Embættið hefði þá haft tækifæri til að fara yfir gögn málsins og þau brot sem konan væri grunuð um væru mjög alvarleg. Meðal gagna í málinu eru myndbandsupptökur sem fundust á heimili hjónanna og af þeim upptökum að dæma mætti sjá að þáttur konunnar væri mikill og hún hefði tekið virkan þátt í brotunum.
Í ákærunni er maðurinn sagður hafa nauðgað dótturinni í félagi við móður hennar ásamt því að taka myndbönd og ljósmyndir af brotunum og framleiða þannig myndefni sem sýni barnið á kynferðislegan hátt. Þá eru þau einnig ákærð fyrir kynferðisbrot gegn dóttur þeirra sem var viðstödd og þurfti að horfa upp á foreldra sína brjóta gegn systur sinni.
Maðurinn er einnig ákærður fyrir að hafa mikið af myndefni sem sýnir börn á kynferðislegan hátt undir höndunum, vopnalagabrot og fyrir að hafa yfir sex ára tímabil ítrekað rassskellt dóttur sína og annað barn á beran rassinn.