Vöðvabúntið Rich Piana, fyrrverandi tengdasonur Íslands, hefur birt myndband á Youtube þar sem hann biðst afsökunar á því að hafa notað ljót orð um blökkumann sem þáverandi kærasta hans hélt við. Horfðu á myndbandið hér fyrir neðan.
Rich Piana komst í fréttirnar hér á landi þegar hann kvæntist Söru Heimisdóttur árið 2015. Leiðir þeirra skildu í fyrra en hann sagði að hjónabandið hafi verið á fölskum forsendum vegna þess að Sara giftist honum aðeins til að fá græna kortið í Bandaríkjunum. Í viðtali í Brennslunni í kjölfarið vísaði Sara ummælum Rich til föðurhúsanna. „Þetta er bara eins og maður segir bunch of bullshit,“ sagði hún og bættir við að hann sé ekki allur sem hann er séður.
Upptaka þar sem Rich Piana notar meðal annars „n-orðið“ til að lýsa umræddum blökkumanni skaut nýlega upp kollinum á internetinu. Rich segir í myndbandinu að upptakan sé að minnsta kosti tíu ára gömul og segir að fyrrverandi kærasta hafi komið henni í dreifingu.
„Þegar ég heyrði upptökuna fyrst mundi ég ekkert eftir þessu og var bara: „Hvað í andskotanum er þetta? Þetta er ekki ég!“ En þetta er augljóslega röddin mín þannig að þetta er ég,“ segir hann í myndbandinu.
Ég vil biðja alla afsökunar. Það er aldrei ásættanlegt að nota þetta orð. Það var rangt af mér að nota þetta orð og ég nota það aldrei í dag.
Hann segir að umrædd fyrrverandi kærasta hafa dreift sögusögnum um að vöðvar hans séu ekki raunverulegir og að hann hafi látið stækka á sér rassinn með hjálp lýtalækna. Þá segir hann að hún hafi komið í dreifingu myndbandi sem sýnir þau stunda kynlíf.
„Hún er búin að vera með mig á heilanum í tíu ár. Upptakan er frá henni,“ segir Rich og bætir við að hann hafi verið brjálæðiskasti þegar upptakan var gerð og að hann hafi verið að nota mikið magn af sterum á þessum tíma.
„Hver veit á hverju öðru ég var þetta kvöld. Ég ætla ekki að neita þessu. Ég sagði þetta og ég er alls ekki stoltur af því. Ég er ekki rasisti og hef aldrei verið. Ég held að flestir viti það. Þegar maður kemst að því að kona sem maður er að stunda kynlíf með er að stunda kynlíf með einhverjum öðrum þá missir maður vitið. Eina sem ég get sagt er að ég biðst afsökunar á því að nota þessi orð.“