„Hvar eru allar fréttirnar á íslenskum fréttamiðlum um það að samtök „hinsegin fólks“ á fleiri hundruð milljón króna fjárframlögum hafi kært homma fyrir að benda á hið augljósa er varðar brjóstagjafir karla í mömmuleik til kornabarna,“ skrifar Eldur Smári Kristinsson, formaður Samtakanna 22 í færslu á Facebook-síðu sinni.
„Núna er staðan hinsvegar þannig að þau átta sig á því að þau hafa ekki almenning með sér í liði lengur og hugmyndafræðin er byggð á sandi og stenst ekki lágmarks gagnrýni. Þá beita þau yfirvaldinu í staðinn. Og núna gegn samkynhneigðum sem toga ekki línuna“
Tilefnið er kæra sem honum hefur borist með milligöngu lögreglunnar á Suðurnesjum en þar hann ásakaður um, „…með ærumeiðingum og brotum gegn friðhelgi einkalífs, hafa breitt út ummæli og ráðist opinberlega með háði, rógi og smánun á hóp ónafngreindra manna vegna kyneinkenna og eða kynvitundar þeirra“ og eru síðan dregin upp ummæli Elds Smára sem birtust á hinum ýmsu fréttamiðlum – allt frá árinu 2023.
Verði ákærður og dæmdur
„Hatursorðræðunni er hvergi nærri lokið. Orðræðan þrífst og dafnar á meðan aðilar á borð við kærða taka afskiptalaust þátt í henni á vefmiðlum og í athugasemdum vefmiðla. Þá eru vissir fjölmiðlar sem upphefja þátttakendur í hatursorðræðunni og taka þannig virkan þátt í að halda henni og upplýsingaóreiðunni við meðal annars kærði,“ segir í kærunni sem nú er til meðferðar hjá embætti lögreglustjórans á Suðurnesjum.
„Á meðal markmiða kæranda, sem félagssamtaka hinsegin fólks hér á landi, er að tryggja að hinsegin fólk njóti fyllstu réttinda í íslensku samfélagi. Kærandi leitast við að ná því markmiði með því að vinna að baráttumálum hinsegin fólks, eftir þeim leiðum sem árangursríkastar þykja hverju sinni. Kæra þessi er lögð fram í því tilliti og með henni vill kærandi stuðla að því að kærði, sem hefur tekið virkan þátt í refsiverðum hatursáróðri gegn hinsegin fólki vegna kyneinkenna og eða kynvitundar þeirra, verði ákærður og dæmdur til refsingar fyrir þá háttsemi sína lögum samkvæmt,“ segir í kærunni undir liðnum „Málsástæður“ en Nútíminn hefur hana undir höndum.
Athyglisvert að sjá framgöngu Samtakanna ´78
„Það er athyglisvert að sjá framgöngu Samtakanna ’78 gegn almennum borgurum sem gagnrýna þau opinberlega. Núna er ég þriðja manneskjan á stuttum tíma sem lendi í neti „hinsegin rannsóknarréttarins“. Það að Samtökin ’78 virðast styðja þessa iðju karla að taka inn lyf til þess að leggja ungabörn á brjóst er mjög umhugsunarvert – en kannski ekki úr takti við hnignandi siðferði innan hreyfingarinnar sem ég einu sinni var hluti af,“ segir Eldur Smári og bendir á hið augljósa að hans mati.
„Núna er staðan hinsvegar þannig að þau átta sig á því að þau hafa ekki almenning með sér í liði lengur og hugmyndafræðin er byggð á sandi og stenst ekki lágmarks gagnrýni. Þá beita þau yfirvaldinu í staðinn. Og núna gegn samkynhneigðum sem toga ekki línuna,“ segir Eldur Smári.
Spurður að því hvernig þessi kæra fari í gegnum kerfið segir hann ómögulegt að spá fyrir um það.
„Það er ómögulegt að spá hvernig þetta fer. Embættismannakerfið og stofnanir ríkisins eru fyrir löngu orðin gegnsýrð af þessari hugmyndafræði og það mun vera margra ára verk að koma málum í eðlilegt horf á ný.“