Sonja Einarsdóttir segir brot af sögu sinni í myndbandi sem er hluti af herferðinni Þekktu rauðu ljósin. Sonja var í ofbeldissambandi í 18 ár. Sjáðu myndbandið hér að neðan.
Í myndbandinu lýsir Sonja líkamlegu og andlegu ofbeldi sem hún varð fyrir í sambandinu. Hún segir að enginn hafi vitað af ofbeldinu.
„Ég var samt áfram í sambandinu, það er eitthvað þarna, óeðlilegt, en samt hélt ég áfram að vera með honum. Skýringin fyrir því að ég hlustaði ekki á viðvörunarbjöllurnar er bara sú að ég gafst ekki upp.”
Sonja segist ekki enn vera laus við áreitið frá manninum en að í dag sé hún ekki lengur hrædd.
Horfðu á myndbandið
Herferðin Þekktu rauðu ljósin er svar Kvennaathvarfsins og Bjarkarhlíðar við síaukinni eftirspurn ungs fólk eftir aðstoð vegna ofbeldis í nánum samböndum. Umræðan um ofbeldi í nánum samböndum beinist oft að fólki sem hefur búið saman og ofbeldið átt sér stað innan veggja heimilisins en skortur er á efni sem beint er til fólks sem er að hefur nýhafið samband.
Herferðin miðar að því að minna á að ofbeldi birtist smátt og smátt í samböndum, að ýmis viðvörunarmerki eru oft undanfari ofbeldisins. Vitundarvakningin felst í stuttum myndböndum þar sem nokkrar hugrakkar konur sem stigið hafa út úr ofbeldissamböndum líta til baka og ræða viðvörunarljósin sem birtust í sambandinu þó þær hafi ekki séð þau fyrr en of seint. Það er von okkar að þessi vitundarvakning auki skilning fólks á ofbeldi í nánum samböndum og hjálpi fólki að sjá rauðu ljósin áður en til ofbeldis kemur.
„Það er von okkar að þessi vitundarvakning auki skilning fólks á ofbeldi í nánum samböndum og hjálpi fólki að sjá rauðu ljósin áður en til ofbeldis kemur.”
Nánari upplýsingar má finna á heimasíðu Rauðu ljósanna. Einnig er hægt að kynna sér úrlausnir hjá Bjarkarhlíð og Kvennaathvarfinu.