Tæplega fertugur karlmaður, sem var stjórnandi í kristilegu unglingastarfi, hefur verið dæmdur í eins og hálfs árs fangelsi fyrir kynferðisbrot gegn unglingsstúlku sem sótti starfið. Maðurinn hafði samræði við stúlkuna allt að tuttugu sinnum á fjögurra mánaða tímabili árið 2015 en hún sagði frá þessu eftir að hún var lögð inn á BUGL seinna sama ár. Rúmlega tuttugu ára aldursmunur er á manninum og stúlkunni.
Stúlkan sótti kristilegt unglingastarf sem maðurinn stjórnaði með unnustu sinni. Maðurinn aðstoðaði stúlkuna á ýmsan hátt og afhenti henni meðal annars lykil að heimili sínu svo hún gæti leitað skjóls þar þegar hún þurfti vegna erfiðra fjölskylduaðstæðna.
Í skýrslu sem stúlkan gaf hjá lögreglu sagðist hún hafa litið á manninn sem trúnaðarvin og föðurímynd. Hún sagðist hafa leitað eftir alúð og faðmlögum en atlotin hefðu smá saman gengið lengra þar til þau höfðu samræði. Stúlkan sagði að maðurinn hefði eftir fyrstu skiptin tekið kynlífinu sem sjálfsögðum hlut. Undir lokin hafi hún minnst á það við manninn að þetta væri ekki sniðugt og síðustu eitt til tvö skiptin hefði hún pínt sig til að stunda kynlíf með manninum.
Maðurinn viðurkenndi að hafa haft samræði við stúlkuna í átján skipti en sagðist hafa gengið úr skugga um að það væri ekki gegn vilja hennar. Sagði hann að stúlkan hefði sótt mikið í hann hvað varðar snertingu og faðmlög. Nándin hefði aftur á móti orðið of mikil á milli hans og stúlkunnar og eitt hafi leitt af öðru. Maðurinn sagðist aldrei hafa ætlað sér þetta og því hafi það tekið á hann í hvert skipti að stunda kynlíf með stúlkunni.
Maðurinn sagðist aðeins vera mannlegur og þrátt fyrir að hann hafi aldrei viljað að neitt kynferðislegt ætti sér stað hafi eitt leitt af öðru. Kynferðislegu samskiptin hefðu tekið á hann en hins vegar hefðu þau orðið auðveldara eftir fyrsta skiptið. Hann sagði að það þyrfti tvo til, að stúlkan hefði daðrað við hann og við það hefði vaknað í honum hvötin.
Hér er hægt að lesa dóminn í heild sinni.