Tveir fyrrverandi stjórnendur hjá lággjaldaflugfélaginu WOW air vinna nú að því að stofna nýtt flugfélag á grunni WOW air með hópi fjárfesta. Fjárfestahópurinn kom saman rétt eftir gjaldþrot WOW air fyrr á árinu með það að markmiði að stofna nýtt lággjaldaflugfélag til að fylla upp í gatið sem myndaðist við fall WOW og í fylgirit Fréttablaðsins, Markaðinum, kemur fram að stefnt sé að því að hefja rekstur næsta haust.
Fram kemur á minnisblaði sem Markaðurinn hefur undir höndum að þegar hafi írski fjárfestingasjóðurinn Avianta Capital lofað að leggja 40 milljónir bandaríkjadala eða um 5 milljarða íslenskra króna til rekstursins í skiptum fyrir 75 prósenta hlut í flugfélaginu sem heitir WAB air.