Framkvæmdastjóri og æðsti yfirmaður Stofnunar múslima á Íslandi, sem hefur aðsetur í Ýmishúsinu í Reykjavík, er rekstraraðili og eigandi leigubílastöðvarinnar Ober. Gögn sem Nútíminn hefur undir höndum sýna með óyggjandi hætti að Stofnun múslima á Íslandi hafi komið að og fjármagnað kaup á að minnsta kosti tveimur leigubifreiðum sem nú eru notaðar í Reykjavík og á Keflavíkurflugvelli til þess að keyra ferðamenn og aðra farþega. Leigubílastöðin hét áður Asmacon en breytti nýlega um nafn og heitir nú Ober – sem þykir ansi líkt Uber en það fyrirtæki er heimsþekkt en er þó ekki með starfsemi á Íslandi.
Umræddur starfsmaður var bannaður á svæðinu eftir að hann réðist á íslenskan leigubílstjóra. En hver ætli sá starfsmaður hafi verið? Jú, það var Said Aajal – sá sem sagður er eigandi Ober.
Nútíminn hefur undanfarna daga rannsakað umrædda leigubílastöð með einkennisorð rannsóknarblaðamanna að vopni en það er „follow the money“ eða eltu peningaslóðina. Það gerði miðillinn og í ljós komu bein tengsl við moskuna í Ýmishúsinu. Þar hefur Karim Askari ráðið lögum og lofum í mörg ár en þó ekki í friði og ró ef svo mætti að orði komast. Við komum að því hér síðar í fréttinni.
Samkvæmt heimildum Nútímans hefur eignarhald á leigubílastöðinni verið falið með notkun á „leppi“. En hvað er leppur? Þetta orð er notað um einhvern sem er notaður eða látinn líta út fyrir að vera ábyrgur fyrir einhverju, án þess að hafa raunverulegt vald eða áhrif. Þetta er notað í samhengi við leppstjórn, leppföður og svo framvegis, þar sem leppurinn er raunverulega undir stjórn annarra. Þessi „leppur“ heitir Said Aajal en sá hefur einnig bein tengsl við moskuna í Ýmishúsinu. Said er í dag skráður bæði eigandi umræddra bifreiða auk þess sem hann er skráður stjórnarmaður í fyrirtækjaskrá fyrir leigubílastöðinni Ober.
Ógnandi og ofbeldishneigður stjórnarmaður
Leigubílastöðin hefur aðsetur í íbúðarhúsnæði í Reykjavík, nánar tiltekið að Smyrilshlíð 10 sem er glænýtt fjölbýlishús á Hlíðarenda. Það þykir vægt til orða tekið einkennilegt að höfuðstöðvar leigubílaþjónustu skuli vera í íbúðarhúsnæði. Þar er leppurinn Said skráður til húsa. En það er ekki eina félagið sem er skráð að Smyrilshlíð 10 og tengist Stofnun múslima á Íslandi. Við nánari athugun kemur í ljós félagið Sama Trips ehf. Það félag var stofnað í síðasta mánuði – þann 1. júní 2024. Forráðamaður þess félags er sá sami og er skráður fyrir Ober Leigubílum ehf. – leppurinn Said Aajal.
Konan hefur starfað sem leigubílstjóri í yfir 20 ár og hefur aldrei á ævinni „upplifað annað eins“
„Ég er skíthrædd við þessa menn,“ sagði leigubílstjóri sem Nútiminn ræddi við. Konan hefur starfað sem leigubílstjóri í yfir 20 ár og hefur aldrei á ævinni „upplifað annað eins“ – eins og hún orðaði það sjálf. Hún segir starfsmenn Ober hafa sýnt henni og öðrum leigubílstjórum ógnandi hegðun og þá hefur Nútíminn einnig heimildir fyrir því að starfsmaður leigubílastöðvarinnar hafi verið bannað að koma inn á umráðasvæði Isavia sem þýðir að hann megi ekki stunda leigubílaakstur á Keflavíkurflugvelli. Umræddur starfsmaður var bannaður á svæðinu eftir að hann réðist á íslenskan leigubílstjóra. En hver ætli sá starfsmaður hafi verið? Jú, það var Said Aajal – sá sem sagður er eigandi Ober.
Þess ber að geta að Ober Leigubílar ehf. fékk leyfi fyrir sölu á dagsferðum hjá Ferðamálastofu fyrr á þessu ári, nánar tiltekið í febrúar. Samkvæmt gögnum frá Samgöngustofu eru nítján aðilar skráðir sem rekstrarleyfishafar á vegum Ober Leigubíla ehf. en þar er hvergi að finna nafn Said. Þrátt fyrir það hefur Said ítrekað verið staðinn að akstri leigubíla og hefur Nútíminn undir höndum gögn sem staðfesta það. Líkt og kom fram hér í fréttinni var Said bannaður á umráðasvæði Isavia eftir umrædda líkamsárás en að henni var fjöldi vitna.
Tengingar við dæmdan hryðjuverkamann
Karim Askari, framkvæmdastjóri og æðsti yfirmaður Stofnunar múslima á Íslandi, er hins vegar skráður sem einn af rekstrarleyfishöfum Ober Leigubíla ehf. – þá er hann einnig skráður sem rekstrarleyfishafi hjá Hopp Leigubílum ehf. og einnig undir „Eigin leigubílastöð.“ Karim hefur staðið í miklum deilum við aðra múslima á Íslandi, þar á meðal Salman Tamimi sem var forstöðumaður Félags múslima á Íslandi. Salman lést árið 2020 en þremur árum áður hafði Karim þessi höfðað mál gegn 365 miðlum og Salman fyrir meiðyrði. Tilefnið var frétt sem Nadine Guðrún Yaghi skrifaði árið 2016 á Vísi undir fyrirsögninni „Þarf að bregðast við tengslum við hryðjuverkasamtök.“ Í fréttinni var greint frá því að Osama Krayem, 23 ára sænskur ríkisborgari og meðlimur ISIS, hafi verið handtekinn í apríl það ár grunaður um aðild að bæði hryðjuverkaárásunum í París og Brussel en sá starfaði fyrir móðurfélag Stofnunar múslima á Íslandi, Alrisalah.
Tengsl Alrisalah við Stofnun múslima á Ísland eru augljós en í frétt Nadine Guðrúnar kom fram að allir stjórnarmenn í félaginu hér á landi væru sænskir ríkisborgarar fyrr utan Karim sem væri íslenskur ríkisborgari. Þá var einnig vitnað í sænska ríkissjónvarpið og viðtal sem var tekið við Hussein Al Daoudi, þáverandi stjórnarmann Alrisalah og stjórnarmann Stofnunar múslima á Íslandi, þar sem hann viðurkenndi að hryðjuverkamaðurinn Osama Krayem hefði starfað fyrir hið sænska móðurfélag Stofnunar múslima á Íslandi. Umfjöllun Nadine Guðrúnar fór ekki vel í þá Hussein Al Daoudi og Karim Askari sem stefndu henni og Salman Tamimi fyrir meiðyrði. Því máli var vísað frá dómi. Það var svo í júlí í fyrra sem Osama Krayem var dæmdur í lífstíðarfangelsi af kviðdómi í Brussel fyrir þátttöku sína í hryðjuverkunum þar í landi sem kostuðu 32 manns lífið.
Fjárframlög frá íslömskum samtökum í Sádí-Arabíu
Þá greindi Vísir einnig frá tengingu Stofnunar múslima á Íslandi, sem þá hét Menningarsetur múslima, við Sádí-Arabíu og Al-Haramein samtökin en þau eru á lista öryggisráðs Sameinuðu þjóðanna yfir hryðjuverkasamtök. Tilefnið var fjárfesting sænskra ríkisborgara á Ýmishúsinu upp á hundruði milljóna króna – húsinu sem nú er bækistöð Stofnunar múslima á Íslandi. En hverjir voru fjárfestarnir og hver var tengingin við hryðjuverkasamtökin Al-Haramein og Sádí-Arabíu? Samkvæmt frétt Vísis voru þeir þrír: Maryam Moe, Sulaiman Abdullah Alshiddi og hver? Jú, Hussein Al-Daoudi. Sami Hussein og höfðaði meiðyrðarmálið ásamt Karim Askari. Í fréttinni kom fram að Hussein Al-Daoudi væri skólastjóri Al-Salam einkaskólans í Svíþjóð en skólinn hafði verið gagnrýndur þar í landi fyrir að þiggja fjárframlög frá íslömskum trúboðasamtökum í Sádí-Arabíu. Trúboðasamtökum sem „…eru nátengd Al-Haramein samtökunum.“
Karim komst líka í fréttirnar í júní árið 2016 en þá kom til átaka manns úr flokki Menningarseturs múslima og Karim Askari sem þá hafði klofið sig frá menningarsetrinu og stofnað Stofnun múslima á Íslandi. Karim tókst þá að fá menningarsetrið, félaga þess, eigur og húsgögn borið út úr Ýmishúsinu sem hann svo tók yfir.
„Ég hélt að þetta væri svo friðsamt land þar sem ekkert þyrfti að óttast. Þar sem allir lifðu í friði og ró. Það síðasta sem mér datt í hug var að ég þyrfti að vara mig á ákveðnum leigubílum“
Því ber að halda til haga að Félag múslima á Íslandi tengist ekki Stofnun múslima á Íslandi. Um er að ræða tvö mismunandi trúfélög sem eldað hafa grátt silfur í gegnum árin en samkvæmt heimildum Nútímans er Stofnun múslima á Íslandi, sem enn hefur aðsetur í Ýmishúsinu og greiðir ekki fasteignaskatt til Reykjavíkurborgar þar sem um trúfélag er að ræða, öfgafyllri og róttækari armur múslima á Íslandi. Heimildarmenn Nútímans sem þekkja til Stofnunar múslima á Íslandi vildu ekki koma fram undir nafni af ótta við hefndaraðgerðir af hálfu félagsins í Ýmishúsinu. Salman Tamimi var hins vegar óhræddur við að tjá skoðanir sínar á hópnum sem lagði undir sig Ýmishúsið en í viðtali við Vísi kom fram að Tamimi hafi tilkynnt hann til lögreglu „þar sem hann óttaðist að öfgaöfl væru að skjóta hér rótum.“ Þá kom einnig fram í umræddu viðtali að honum og öðrum í Félagi múslima á Íslandi hefði fundist að menn á borð við Karim Askari væru að ýta undir „…alls kyns öfga í sambandi við trú og þjóðerni fólks.“
Íslensku hótelin vara ferðamenn við
Nútíminn ræddi einnig við hótel og ferðamenn í miðborg Reykjavíkur en hótelin hafa tekið til þess ráðs að beina viðskiptavinum sínum á leigubílastöð Hreyfils og hafa þau varað við leigubílastöðvum City Taxi og Ober, sem áður hét Asmacon. Ferðamenn sem Nútíminn ræddi við sögðu það ótrúlegt að þeir þyrftu að vara sig á ákveðnum leigubílastöðvum hér á landi.
„Það er ekki bara nóg að gera rassíu í einn dag og svo ekkert meir. Það er verið að valta yfir okkur sem höfum staðið í þessu í fjöldamörg ár hér á Íslandi og öryggi okkar er ógnað. Það veit lögreglan enda hafa ófá mál verið tilkynnt til hennar vegna þessa.“
„Ég hélt að þetta væri svo friðsamt land þar sem ekkert þyrfti að óttast. Þar sem allir lifðu í friði og ró. Það síðasta sem mér datt í hug var að ég þyrfti að vara mig á ákveðnum leigubílum,“ sagði Muller, bandarískur ferðamaður sem blaðamaður Nútímans hitti í miðborg Reykjavíkur í gær þar sem hann snæddi á veitingastað við Vegamótastíg. Muller þessi sagði að starfsmaður hótelsins sem hann gisti á í Reykjavík hafi látið hann fá nafnspjöld Hreyfils sem hann svo tók mynd af til þess að átta sig á einkennismerki stöðvarinnar. Þetta sagði hann að starfsmaðurinn hafi gert til þess að þau hjón myndu ekki „lenda í vandræðum“ eins og hann orðaði það.
Flogist á við flugstöðina: Stríðsástand meðal íslenskra og erlendra leigubílstjóra – MYNDBÖND
Ein rassía ekki nóg
Þá sýndi Muller ljósmyndina sem hann tók og bað svo blaðamann Nútímans að aðstoða sig við að hringja í leigubíl frá Hreyfli – þau hjón væru á leiðinni heim eftir velheppnaða draumaferð til Íslands.
Átökin um leigubílaþjónustu á Íslandi virðast engan endi ætla að taka. Á sama tíma og handalögmál eiga sér stað á Keflavíkurflugvelli og íslenskir leigubílstjórar forðast ákveðin svæði vegna ógnandi hegðunar erlendra leigubílstjóra þá virðast umsvif Ober Leigubíla ehf. fara stækkandi með hverjum mánuðinum. Þeir leigubílstjórar sem Nútíminn hefur rætt við undanfarna daga furða sig á aðgerðarleysi lögreglunnar á Suðurnesjum og lögreglunnar á höfuðborgarsvæðinu.
„Það er ekki bara nóg að gera rassíu í einn dag og svo ekkert meir. Það er verið að valta yfir okkur sem höfum staðið í þessu í fjöldamörg ár hér á Íslandi og öryggi okkar er ógnað. Það veit lögreglan enda hafa ófá mál verið tilkynnt til hennar vegna þessa.“
Nútíminn reyndi við vinnslu fréttarinnar að ná tali af Karim Askari en það reyndist árangurslaust. Nútíminn mun halda áfram að greina frá átökum á leigubílamarkaðnum á Íslandi og verður þá vonandi hægt að koma sjónarmiðum Karims Askari á framfæri.