Stúlkan sem Björn Bragi Arnarson, skemmtikraftur, hefur viðurkennt að hafa áreitt á Akureyri um helgina hefur sent fjölmiðlum yfirlýsingu. Í yfirlýsingunni sem sjá má hér að neðan segir stúlkan að hún og fjölskylda taki afsökunarbeiðni Björns Braga góða og gilda.
Myndband sem sýndi Björn Braga Arnarsson vera að þukla á stúlkunni fór í dreifingu á samskiptamiðlum í gærkvöldi. Björn sendi í kjölfarið frá sér yfirlýsingu vegna málsins þar sem hann baðst afsökunar.
Yfirlýsingin stúlkunnar má sjá hér að neðan
Yfirlýsing.
Ég sendi þessa yfirlýsingu til fjölmiðla, vegna frétta af atviki á veitingastað Hlöllabáta á Akureyri aðfaranótt sl., sunnudags, þar sem landsþekktur skemmtikraftur og fjölmiðlamaður er sakaður um háttsemi sem sé kynferðisleg áreitni við stúlku.
Ég er sú stúlka sem um ræðir.
Ég tók mynd af þessum þekkta manni þegar hann snerti mig, mér var brugðið og þetta olli mér óþægindum. Ég sendi þetta myndskeið til nokkurra vina minna sem var hugsunarleysi. Í framhaldi var það komið mjög víða og ég fékk fljótlega viðbrögð frá fólki sem var með mjög sterkar meiningar um kynferðislegt athæfi og áreitni. Það var þá sem það rann upp fyrir mér að það var komin af stað atburðarás sem ég ræð ekkert við og var aldrei ætlunin. Ég hef haft af þessu mikil óþægindi einkum frá fjölmiðlum þar sem verið er að gera úr þessu eitthvað sem ég upplifði ekki.
Ég óska einlæglega að þessu linni og að það sé hér með leiðrétt að þetta atvik var ekki með þeim hætti sem reynt er að setja í búning alvarlegrar kynferðislegrar áreitni. Ég vil taka það fram að ég er 17 ára og fær um að meta sjálf samskipti við aðra einstaklinga og mín mörk.
Ég vil taka fram að mjög fljótlega í því ferli sem fór af stað eftir að myndirnar fóru út, hefur þessi einstaklingur sem í hlut átti, nokkrum sinnum haft samband við mig og foreldra mína og beðist fyrirgefningar á framkomu sinni.
Fyrirgefningin er tekin góð og gild af minni hálfu og foreldra minna.
Ég bið einnig um að nafn mitt og persóna verði ekki umfjöllunarefni.