„Súrasta reynsla sem ég hef lent í og það var eitthvað sem sveið alveg rosalega og virðist alveg óskiljanleg á þeim tíma sem maður gengur í gegnum hana,“ segir fjölmiðlamaðurinn Helgi Jean Claessen áður en hann fer yfir þau ósköp sem dundu yfir hann fyrir tíu árum síðan þegar tvær konur tóku sig saman og fjárkúguðu hann fyrir upplogna nauðgun.
„Ég vonaðist innst inni að þetta væru ekki þær því ég vissi að ef þetta væru þær að þá þýddi það að ég þyrfti að stíga fram.“
Helgi Jean er nýjasti viðmælandi Spjallsins með Frosta Logasyni og fer yfir þessa ömurlegu lífsreynslu og aðra viðburði í lífi hans sem hafa gert hann að þeim manni sem hann er í dag. Viðtalið er aðgengilegt með áskrift að hlaðvarpsveitunni Brotkast en hér fyrir neðan er birt brot úr viðtalinu með góðfúslegu leyfi.
Fyrst Helgi – svo forsætisráðherra Íslands…
Helgi Jean segist hafa upplifað mikið myrkur og algjört ráðaleysi þegar konurnar tvær ljúga þessu upp á hann. Þetta tók samt óvænta beygju þegar hann heyrði í fréttum af annarri fjárkúgun sem sjálfur forsætisráðherrann lenti í.
„Þegar þetta kom upp með forsætisráðherrann þá kom alveg svona í mig: „Oh shit“ – þá var búið að segja að þetta væru einhverjar systur,“ segir Helgi Jean sem þá tengdi við konurnar tvær sem höfðu reynt að fjárkúga hann en þær voru einmitt líka systur.
Fékk kvittun fyrir fjárkúguninni
„Ég vonaðist innst inni að þetta væru ekki þær því ég vissi að ef þetta væru þær að þá þýddi það að ég þyrfti að stíga fram. En auðvitað var samt allt í mér sem þráði að stíga fram með þetta. Eftir að maður hefur verið beittur einhverju svona óréttlæti, eins og þarna þá létu þær mig greiða einhverja 700 þúsund krónur eða eitthvað sem var bara heilmikill peningur og það í svörtu. Ég lét þær skrifa undir kvittun og allt sem þótti smá húmor þarna eftir á – að einhver hafi skrifað kvittun fyrir fjárkúgun.“
Virkilega áhugavert viðtal við þáttastjórnandann, rithöfundinn og lífstílsþjálfarann Helga Jean Classen sem hefur marga fjöruna sopið á lífsleiðinni, svo mikið er víst. Þú getur hlustað á brot úr viðtalinu hér fyrir neðan en hægt er að bæði horfa á það og hlusta í fullri lengd með áskrift að hlaðvarpsveitunni Brotkast.