Tölvuþrjótar réðust á vefsíðu RÚV í gærkvöldi og lá hún niðri tæplega fjóra klukkutíma. Þetta kemur fram á vef RÚV.
Í umfjöllun um málið á vef RÚV kemur fram að árásin hafi lýst sér þannig að hlekkir á síðunni vísuðu út fyrir ruv.is og á vafasamt efni. „Þegar þetta kom í ljós var vefnum lokað og hann ekki settur í loftið aftur fyrr en tryggt var að árásinni hefði verið hrundið,“ segir í frétt RÚV.
Baldvin Þór Bergsson, dagskrárstjóri númiðla og Rásar 2, segir á vef RÚV að árásin hafi verið gerð á vefumsjónarkerfi ruv.is og notendur snjalltækja hafi einkum orðið fyrir óþægindum þar sem svo virðist að tölvuþrjótarnir hafi beint spjótum sínum að þeim.
„Farið hefur verið yfir öll öryggisatriði og gengið úr skugga um að notendur ruv.is verði ekki fyrir frekari óþægindum vegna árásarinnar,“ segir á vef RÚV.