Grín Tvíhöfða um helgina þar sem fréttaritari þáttarins í Vestmannaeyjum hringir inn hefur vakið mikla athygli, enda fáránlega fyndið. Fjölmiðlamaðurinn Helgi Seljan var á meðal þeirra sem vakti athygli á gríninu og sagði að þau sem væru ekki búin að hlusta hafi hreinlega ekki lifað. Hlustaðu á grínið hér fyrir ofan eða hlustaðu á allan þáttinn í Sarpinum á vef RÚV.
Þið sem ekki hafið hlýtt á viðtal Tvíhöfða við fréttaritara RÚV í Eyjum, manninn í Prakkarafélaginu:
Þér hafið ekki lifað! pic.twitter.com/T4fDcijH8l
— Helgi Seljan Jóhannsson (@helgiseljan) August 6, 2017
„Fréttaritari Tvíhöfða“ hafði sterkar skoðanir á umræðunni um kynferðisbrot á hátíðinni og hafði sjálfur lent í veseni ásamt félögum sínum í Prakkarafélagi Vestmannaeyja.
Hann segir frá því að þeir félagar hafi ákveðið aðfaranótt laugardags að gera smá sprell með því að kíkja í tjöld og kítla stelpur sem lágu þar sofandi. Það fór eins og gefur að skilja ekki vel í þær stúlkur sem urðu fyrir kítlinu. „Við vorum bara að fara inn til þeirra og kítla þær, bara í stríðni, auðvitað var þetta bara sprell. Er það kynferðislegt? nei það er það ekki,“ sagði prakkarinn.
Hann var heldur ekki sáttur við þau viðbrögð sem prakkararnir fengu en ætlar þó ekki að láta gagnrýnina á sig fá. „Það komu einhverjar kvartanir sem voru ekki byggðar á neinu raunverulegu. Hvað er að því að kítla hressar ungar konur sem eru að skemmta sér, við hlustum ekki á svona. Við megum ekki missa leikgleðina og erótíkina úr hinu daglega lífi,“ bætti prakkarinn við.
Prakkarinn vildi lítið gera úr umræðunni um kynferðisbrot á hátíðinni og vill að fjölmiðlar einblíni á það jákvæða. „Þegar svona margir koma saman að skemmta sér þá gerist það náttúrulega að það eru ekki allir sem skemmta sér jafn vel. Það er nú bara eins og gengur og gerist. Það nær engri átt að vera að blása það upp sem eitthvað aðalatriði.“
Þáttinn í heild má heyra í hér en viðtalið við prakkarann hefst eftir 37 mínútur.