Á glæstum ferli sínum hefur heimildamyndagerðamaðurinn David Attenborough fengið tækifæri til að kynnast fleiri dýrategundum en flestir geta nefnt. En það kann að koma sumum á óvart hvaða tegund stendur upp úr. Það er mannfólkið. Þetta kom fram á vef Hello Magazine.
Attenborough sagði frá þessu þegar hann ræddi við fjölmiðla á frumsýningu nýju þáttanna Our Planet, sem voru birtir á Netflix í dag. „Mannfólkið er í uppáhaldi!“ Sagði Attenborough. „Ef þú værir umkringdur af alls konar dýrum í dýragarði og barnið þitt væri þar líka, til hvers færir þú?“
Attenborough talaði einnig um áhrif mannfólks á jörðina. Hann sagði að við værum sérlega áhrifarík tegund en að við værum að breyta jörðinni til hins verra um þessar mundir.
Our Planet er átta þátta sería sem var að koma inn á Netflix og í henni er fjallað um verðmæti lífs á jörðinni og þau svæði þar sem dýralíf blómstrar enn. Þættirnir voru teknir upp í 50 löndum á fjögurra ára tímabili.