Utanríkisráðherra Tyrklands hefur látið í ljós óánægju sína með meðferð karlalandsliðs þeirra í fótbolta á Keflavíkurflugvelli í gærkvöldi. Landsliðsmenn Tyrkja kvörtuðu yfir töfum og þurftu að ganga í gegnum sérstakt vegabréfseftirlit. Þá var tekið viðtal við einn landsliðsmann með uppþvottabursta.
Sjá einnig: Tók viðtal við landsliðsmann Tyrkja með uppþvottabursta og allt varð brjálað
Á Vísi.is kemur fram að Burak Yilmaz, leikmaður liðsins, hafi greint frá því að starfsmenn Keflavíkuflugvallar hefðu látið landsliðið bíða í rúma þrjá tíma við vegabréfaeftirlitið og að þeir hafi þurft að undirgangast ítarlega og endurtekna leit áður en þeim var hleypt inn í landið.
Í kjölfarið tók á móti þeim hópur fjölmiðlafólks, þar á meðal uppþvottaburstaþrjóturinn, sem rétti þvottabursta í andlitið á Emre Belozoglu, fyrirliða tyrkneska liðsins.
Mevlut Cavusoglu, utanríkisráðherra Tyrklands, segir þessa meðferð á liðinu óásættanlega út frá diplómatískum og mannréttindalegum sjónarmiðum.
Milli Takımımızın İzlanda havaalanında maruz kaldığı muamele diplomatik teamüller bakımından da insani bakımdan da kabul edilemez. Gereğini yapacağımızdan milletimizin şüphesi olmasın. ?? @TFF_Org @MilliTakimlar
— Mevlüt Çavuşoğlu (@MevlutCavusoglu) June 10, 2019