Þáttastjórnendur Spegilsins á Rás 1 hótuðu að henda Ástþóri Magnússyni forsetaframbjóðanda út úr hljóðveri Ríkisútvarpsins í gær og sökuðu hann um að reyna að taka yfir þáttinn. Hlustaðu á brot úr þættinum hér fyrir ofan.
Sjá einnig: Frambjóðendur í kappræðum í beinni á Facebook, Davíð á einn eftir að svara boðinu
Ástþór reiddist í þættinum og sakaði þáttastjórnendur um að reyna að þagga niður í sér. Ástþór óð í Guðna Th. Jóhannesson forsetaframbjóðanda og sagði hann vera frambjóðanda Sjálfstæðisflokksins.
Guðni fór yfir ásakanir Ástþórs, sagðist einnig hafa verið bendlaður við Samfylkinguna og sagði fólkið sem starfar að framboði hans vera gamla vini.
Hann sagðist aldrei hafa verið í flokki og aldrei látið flokkspólitík ráða gerðum sínum, það sýni öll hans verk, og sé ekki að fara að byrja á því núna.
Ástþór var nokkuð æstur og þáttastjórnendur fengu að lokum nóg. „Ástþór, ef þú ætlar að taka yfir stjórn þáttarins þá verðum við að biðja þig um að gera svo vel að yfirgefa þáttinn,“ sagði annar þáttastjórnenda.
Viltu hlusta! Þú verður að sýna fólki sem er hér þá tillitsemi að reyna ekki að taka af því þáttinn og eyðileggja hann.
Ástþór sagðist ekki hafa reynt að taka yfir stjórn þáttarins. Hlustaðu á brot úr þættinum hér fyrir ofan.