Það er ekki leiðinlegt að enda Þjóðhátíð í Vestmannaeyjum með 37 milljónir íslenskra króna inni á bankareikninginum. Flestir þora ekki að kíkja á heimabankann eftir „góða“ helgi en einn stálheppinn gestur á Þjóðhátíð þurfti hins vegar ekki að hafa neinar áhyggjur af því. Þessi einstaklingur var á leiðinni í Herjólfsdal þegar hann ákvað að kaupa 10 raða miða í Eurojackpot.
„Hinn heppni ætlar að nýta vinninginn til að kaupa sína fyrstu íbúð en hann býr hjá foreldrum sínum“
Samkvæmt tilkynningu frá Getspá pældi þessi heppni einstaklingur ekkert í miðanum sem hann keypti enda tók gleðin öll völd í dalnum þessa helgi. Hann sagði þó við félaga sína að þeir þyrftu ekki að hafa neinar áhyggjur af kostnaðinum um helgina því „hann myndi borga allt með Eurojackpot-vinningnum.“
Hélt að þetta væri símahrekkur
Það var ekki fyrr en eftir Þjóðhátíð sem að þessi einstaklingur fékk símtal frá starfsmanni Getspár sem tjáði honum það að hann hafi unnið 37 milljónir. Viðkomandi var ekki alveg að kaupa það til að byrja með – hann var staddur í vinnu sinni og frekar þreyttur eftir skemmtanahöld helgarinnar. Þá var hann þess fullviss að vinir sínir væru að gera símahrekk….
…allt kom þó fyrir ekki því hann vann 37 milljónir í þriðja vinnig í Eurojackpot en hann vann á síðustu röð seðilsins – þá einu sem hann valdi ekki í sjálfvali heldur hafði hann sett inn afmælisdaga fjölskyldunnar. Þeir afmælisdagar eru eitthvað sem hann kemur aldrei til með að gleyma.
„Hinn heppni ætlar að nýta vinninginn til að kaupa sína fyrstu íbúð en hann býr hjá foreldrum sínum og hefur verið að skoða sig um á fasteignamarkaðnum. Öllum vinningshöfum hjá Getspá býðst fjármálaráðgjöf frá utanaðkomandi sérfræðingum og ætlar vinningshafinn að nýta sér hana,“ segir í tilkynningu frá Getspá.