Vigdís Hauksdóttir, þingkona Framsóknarflokksins og formaður fjárlaganefndar, segir að verið sé að fórna hreinlætinu með því að hætta að kynjaskipta salernum í Verzlunarskóla Íslands. Hún segir mikilvægt að karlar verði látnir pissa sitjandi. Þetta kemur fram á Vísi.
„Aumingja stelpurnar að fara á útpissuð klósett,“ sagði Vigdís um málið á Facebook.
Í samtali við Vísi segist hún vera svo undrandi á þessari umræðu að hún geti ekki orða bundist. „Mér finnst hreinlætinu fórnað í þessu máli,“ segir hún.
Það er hægt að ná jafnréttinu fram með mörgum öðrum hætti.
Vigdís segir á Vísi að það sé mikilvægt að karlmenn verði skyldaðir til að pissa sitjandi, verði þetta að veruleika.
Edda Marín Ólafsdóttir og Helena Björk Bjarkadóttir, formenn Femínstafélags Verslunarskólans, sögðu í Morgunútvarpinu á Rás 2 í morgun að nemendur í skólanum hafi tekið frábærlega í breytinguna. „Við höfum ekki fengið neitt neikvætt þannig að okkur finnst þetta eiginlega bara æði hvað allir eru að taka vel í þetta.“